2010ko Ekainak 29 - Satur Ibargoyen | San Martzial Alardeko Jenerala
“Alardea ez litzateke gauza bera izango espaloietan egoten diren
irundarren presentzia, maitasuna eta bultzadagatik ez balitz"
Bederatzigarren urtea du hau Satur Ibargoyenek Jeneral gisa. Aurten berarekin
hitz egin dugu berriz ere gaur egungo hainbat gairi buruz, esate baterako San Juan
plazako lanei buruz eta Batzordeak ekainean zehar antolatutako ekintzei buruz.
1- Gure jaien inguruko ekintzaz betetako urtea izan da aurtengoa eta jende askok
hartu du parte horietan. Jendeak parte hartzea garrantzitsua eta aldi berean
hunkigarria al da?
Uste dugu gure ospakizunaren kultur balioa handia dela eta erakutsi beharra
daukagula. Hori izan zen komikia ateratzeko arrazoietako bat; lan bikaina izan
da, eta irundarren artean ahogozo ederra uzten ari da. Ildo beretik, Amaian
egindako hitzaldiak ere primerakoak izan dira eta gure historia hobetoxeago
ezagutzeko aukera eman digute eta baita beste jai batzuk eta horien
ezaugarriak ezagutzeko aukera ere. Zorionez, ekintza hauek guztiak ondo atera
zitezen barnean zuen onena eman duen taldea dugu.
Beste horrenbeste Alardealdiaz, ze jendearen inplikaziorik gabe, ezinezkoa
izango bailitzateke. Zorionak eta nire eskerrona guztientzat.
2- Astebete eskas geratzen da, nola ikusten duzu aurtengo ekainaren 30a?
Bada, gutxi gorabehera urtero bezala, ilusio handiarekin eta ondo egiteko
gogoa izango den itxaropenarekin, bai troparen aldetik bai espaloietan;
eta guztion artean ahaztu ezin den Alardea egiteko itxaropenarekin.
3- Ibilbidea dela eta sortutako arazoak konpondu dira azkenean.
Bai, eskerrak. Uste dut batzuek San Juan plazaren egoera aprobetxatu nahi
izan dutela beren interesak lortzeko eta saiatu dira, egia ez diren mezuak
bidaliz, gure Alardeak egonkortasuna gal zezan. Gure antolatzaileek Alardea
egiteko baimena eskatu zuten ordutegi eta ibilbide jakin batekin, baina erabakia
ez zegoen gure esku; ondoren, Barne Sailak Udalaren ebazpena zuzendu egin
zuen ordutegiei zegokienez, talde batek guk lehenago eskatutako ibilbidearekin
eta ordutegiekin manifestazio bat eskatu zuelako. 6 hilabete aurretik
prestatuta geneuzkan beste ibilbide batzuk, baina Alardea asko luzatzen
zuten, bai ibili beharreko bidean bai egiteko erabili behar zen denboran.
Horregatik, eman duten irtenbidea zuzena iruditzen zait niri, eta zuhurrena.
4- Mezuren bat troparentzat eta kantinerentzat?
Troparentzat urteroko mezu berbera, ez botatzeko tiro solterik, arriskutsuak
direla eta; goza dezatela egun hauez eta eurek badakitela zer eta nola egin
dena ondo atera dadin.
Eta Kantinerei dagokienez, berriz, zer esango diet nik… dagoeneko ari dira
gozatzen, hau da beren urtea, gure jaiaren protagonista direnekoak. Primeran
ordezkatuko dute emakume irundarra; horixe da jendeak beraiengandik
espero duena, eta horixe da egiten ari direna, eta ederki, gainera!
5- Ze mezu bidaliko zenieke espaloietatik Alardea ikusiko duten irundarrei?
Zaila da guzti-guztia ematen duenari mezu bat bidaltzea. Alardea ez litzateke
gauza bera izango jendearen presentzia, maitasuna eta bultzadagatik ez balitz.
Nik behintzat jasotzen dudan eta itzuli ezin dudan maitasuna eskertu nahi dut;
eta orokorrean denei opa diet itxaronaldi luzean zoriontsuak izan daitezela eta
ezerk ez inork ez dezala hainbeste irrikaz espero dugun egun hori ilundu.
|
